ភ្នំពេញ៖ រដ្ឋាភិបាលសម្រេចដាក់ចេញនូវយុទ្ធនាការ «ទស្សនាស្រុកយើង» ក្រោមស្មារតី ស្រលាញ់ជាតិត្រូវស្គាល់ទឹកដី សំដៅជំរុញទេសចរណ៍ផ្ទៃក្នុង តាមរយៈការបង្កលក្ខណៈងាយស្រួលឱ្យប្រជាពលរដ្ឋអាចធ្វើដំណើរបានទូទាំងប្រទេសប្រកបដោយសុវត្ថិភាព និងក្ដីសប្បាយរីករាយ។

ក្នុងសេចក្ដីជូនដំណឹងនៅថ្ងៃទី២៦ ខែតុលានេះក្រសួងទេសចរណ៍បានលើកឡើងថាដើម្បីឱ្យសម្រេចបានគោលនយោបាយជំរុញចលនាទេសចរណ៍ផ្ទៃក្នុងឆ្នាំ២០២១-២០២៣ ឱ្យបាន ១១លាននាក់ ក្នុងឆ្នាំ២០២៣ ក្រសួងបានដាក់នូវគោលដៅចំនួន៥ ដែលរួមមាន ការបង្កើនការជឿទុកចិត្តរបស់ភ្ញៀវទេសចរផ្ទៃក្នុងតាមរយៈការគ្រប់គ្រងធានាសុវត្ថិភាពដល់គ្រប់ភាគី សម្រួលលក្ខខណ្ឌអំណោយផលសម្រាប់ការបើកដំណើរការអាជីវកម្មប្រតិបត្តិការទេសចរណ៍ បង្កលក្ខណៈងាយស្រួលនិងសម្រួលដល់ការធ្វើដំណើរកម្សាន្តរបស់ភ្ញៀវទេសចរណ៍ ជំរុញការបង្កើតផលិតផលសេវាកម្មទេសចរណ៍ថ្មីដើម្បីទាក់ទាញទេសចរណ៍ និងបង្កើនការផ្សព្វផ្សាយពីវីដេអូទេសចរណ៍ ចម្រៀង សាច់រឿង តាមបណ្ដាញផ្សព្វផ្សាយសង្គម និងប្រព័ន្ធឌីជីថល។

ក្រសួងទេសចរណ៍បានបន្ថែមថា៖ «ដើម្បីធានាការសម្រេចបាននូវការអនុវត្ត វិធានការគោលនយោបាយជំរុញចលនាទេសចរណ៍ផ្ទៃក្នុង ឆ្នាំ២០២១-២០២៣ នេះប្រកបដោយជោគជ័យ និងប្រសិទ្ធភាពខ្ពស់ ទាមទារចាំបាច់នូវការចូលរួមពីគ្រប់ភាគីពាក់ព័ន្ធទាំងអស់ប្រកបដោយការទទួលខុសត្រូវខ្ពស់រៀងៗខ្លួន ដោយឈរលើគោលការណ៍ភាពជាដៃគូ “រដ្ឋ-ឯកជន-ប្រជាពលរដ្ឋ និងភ្ញៀវទេសចរ-ដៃគូអភិវឌ្ឍ”»។

នៅថ្ងៃនេះផងដែរ ក្រសួងទេសចរណ៍ក៏បានប្រកាសបើកទទួលទេសចរណ៍វ៉ាក់សាំងជំហានដំបូងចាប់ពីថ្ងៃទី៣០ វិច្ឆិកា ឆ្នាំ២០២១ នៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតារាសាគរនៃខេត្តកោះកុង និងចាប់ពីខែមករា ឆ្នាំ២០២២ ចាប់ផ្ដើមនៅខេត្តសៀមរាប។ ការប្រកាសបើកនេះត្រូវបានធ្វើឡើងបន្ទាប់ពីស្ថានភាពជំងឺកូវីដ-១៩ នៅកម្ពុជាមានការថយចុះគួរឱ្យកត់សម្គាល់ នៅអំឡុង២សប្តាហ៍ចុងក្រោយ៕